كل مايخص node js

م بقولك ايه .. انا عايز nudes
- الله يخربيت أهلك nudes ايه بس 😂😂 ... اسمه node js (نود جي إس)
= طيب هو ايه الnode ده و بيعمل ايه؟
- انا راجل ف زراعه و فلاح و مليش ف الكلام المعقد ف هشرح الموضوع بأبسط طريقه ان شاء الله

ببساطه كدا جوا كل متصفح فيه شويه محركات .. اه محركات بس مش زي محركات العربيات طبعا😂 .. محرك هنا مقصود بيها برنامج جوا المتصفح مسؤول عن وظيفه معينه .. يعني مثلا فيه محرك مسؤول عن قراءه الصور و الفيديوهات و الصوت و محرك تاني مسؤول عن قراءه الhtml و محرك تالت مسؤول عن قراءه الجافاسكريبت و هكذا...

كلنا عارفين ان متصفح جوجل كروم أحسن متصفح موجود ... ليه هو الأحسن؟
ببساطه علشان جواه أحسن المحركات الموجوده .. واحده من المحركات القويه جدا فيه هو محرك الجافاسكريبت (أسم المحرك هو V8) ... المحرك ده مسؤول عن انه بياخد كود الجافاسكريبت الي احنا بنكتبه و بيحوله ل لغه بسيطه جدا جدا بيفهمها الكمبيوتر بس .. العمليه ديه اسمها الترجمه أو الCompiling

= طيب حلو .. انا فهمت يعني ايه محركات و فهمت محرك الجافاسكريبت بتاع كروم .. ايه علاقه الكلام ده بnode؟

- يا ابني متوجعش قلبي معاك أصبر 😂
ف يوم الناس الي شغالين ف جوجل قالوا م تيجي نخلي جوجل كروم مفتوح المصدر ;) (Open source) و نخلي الناس تشوف الكود بتاع المتصفح و تشوف هو شغال ازاي .. و الناس كمان هتقدر تشوف المحركات بتاعت جوجل كروم و تلعب فيها و تعمل الي انت عايزه فيها .. ناس جدعان أوي والله 😂

المهم سنه 2009 واحد ابن ناس كدا اسمه Ryan Dahl قال طيب م تيجي نجرب ناخد محرك الجافاسكريبت(الي اسمه V8) و نخليه يشتغل بشكل قائم بذاته من غير م يكون معتمد علي باقي المحركات و نخلي المحرك ده قابل انه يشتغل علي أي نظام تشغيل (سواء ويندوز أو ماك أو لينكس) .. هنا اتولدت الNode JS

الي عمله الراجل ده كان نقله نوعيه ف عالم الجافاسكريبت .. كدا الجافاسكريبت تقدر تشتغل بقوه خارج المتصفح و تقدر تشغلها جوا نظام التشغيل بتاعك

طيب علشان بس نقدر أهميه و تقل الموضوع ..ساعد على انتشار تطبيقات real time apps بأنه قدملنا مشاريع قورية زي socket.io ... يعني أكتر من نص البرامج و التطبيقات الي بنستخدمها بشكل يومي مكنتش هتكون موجوده .. أي برنامج شات ابن ناس مكنش هيبقي موجود .. أي تطبيق فيه بث حي لأي نوع من الداتا مكنش هيبقي ممكن

حجات عظيمه زي Meteor, Express, SailsJS و كتير غيرهم مكنش هيبقي ليهم وجود
و النود قدر انه يورينا أقصى استفادة من الـFront-end Frameworks زي الـAngular, react, ember
لانه بكده بيخليك تكتب كل حاجة بالجافاسكربت, و كأنك بتكتب بروجكت واحد
طبعا فيه بدائل للnode لكن مفيش حد فيهم بقوه و سرعه الnode

بدائل مقصود بيها لغات تانيه .. و انا قاصدي طبعا في نواحي معينه بس مش كل النواحي
مفيش لغه محدده ينفع نقول عليها بشكل مطلق انها أحسن من كل النواحي

ان شاء الله هعمل بوست تاني هيكون تيكنيكال شويه و فيه مصادر لتعلم الnode .. البوست ده بس كان علشان نفهم هو ايه البتاع ده اصلا
ملحوظه مهمه: انا استخدمت ألفاظ مبسطه علشان أبسط الموضوع و يتفهم بسهوله .. لو عايز تعرف الألفاظ بدقه ممكن تكمل قراءه من المصادر

المصادر:
https://goo.gl/agmzmF
https://goo.gl/xQiKmb
https://goo.gl/dwzRhc
https://goo.gl/UndpHA